Қостанай: Қару-жарақ дүкеніндегі жарылыстың себебі анықталды
Бас прокуратура биылғы жылғы 3 қыркүйекте Қостанай қаласында болған «Оружейная палата» дүкеніндегі жарылыс және өрт фактісін тергеп-тексеруді жалғастырып жатыр.
Өрт салдарынан 11 адам зардап шекті, оның 4-еуі қайтыс болды. Олардың барлығы дүкеннің жұмыскерлері еді. Жарылыстан көршілес орналасқан коммерциялық нысандар мен тұрғын үйлер де зақымданды.
Тергеу анықтағандай, дүкеннің басшысы оқ-дәрі өткізуге рұқсаты болғандықтан, оқиға қарсаңында Қарағанды облысынан «Сокол» маркалы 40 килограмм оқ-дәріні кейіннен өлшеп орау және сату үшін сатып алған.
Бас прокуратураның баспасөз қызметінің мәліметінше, бұл оқ-дәрі Қостанай қаласына ауа температурасы 36 градус ыстық болған кезде қауіпті жүктерді тасымалдау ережелерін бұза отырып тасымалданған және жарылыс орын алған дүкеннің жертөле бөлмесіне сақтауға қойылған.
Сарапшылар жарылыстың себебі оқ-дәрінің тұтануы болды деген шешім шығарды. Бұл қирауға және өрттің тұтануына әкеп соққан. Қазір тергеу кінәлі адамдардың жауаптылық дәрежесін анықтап жатыр.
Комментариев пока нет