Қарағандыда балалардың жаппай улануына қатысты қылмыстық іс қозғалды

Қарағанды облысында балалардың жаппай улануына қатысты қылмыстық іс қозғалды. Бұл туралы Бала құқықтары жөніндегі уәкіл Динара Зәкиева әлеуметтік желідегі парақшасында жазды, деп хабарлайды Exclusive.kz.

– Өкінішке қарай, бір бала қайтыс болды. Оның ата-анасына қайғыра көңіл айтамын. Алты бала ауыр халде жан сақтау бөлімінде, жеті бала ауруханада жатыр. (Тағы 2 бала түсті). Олардың арасында жетім балалар да бар. Қазіргі таңда бұл оқиғаға байланысты қылмыстық іс қозғалып, комиссия құрылды. Улану себептерін анықтау бойынша жұмыс жүргізілуде. Балаларға медициналық-әлеуметтік қызметтер көрсететін 84 мекеменің барлығында Бас прокуратура кешенді тексеріс жүргізетін болады. Оның 20-сында жетім балалар мен ата-анасының қамқорлығынсыз қалған балалар тұрады, – деп жазды Зәкиева.

Бала құқықтары жөніндегі уәкіл күзде барлық балалар мекемелерін тексеруді жоспарлап отырғанын айтты.

Сондай-ақ мамандарды даярлау сапасын, олардың деңгейін назарға алу керектігін жеткізді.

Фото: ашық дереккөз