Қаржылық пирамида дауына іліккен вайнерлер кінәсін мойындамады

Алматыда Mudarabah Capital қаржы пирамидасы туралы іс бойынша негізгі сот талқылауы басталды. Бұл іс Zoom платформасы арқылы онлайн режимінде қаралды. Сот процесіне қатысқан Прокурор күдіктілерге қатысты айыптау актісін оқыды.

– 2019 жылы Алмас Құрманғалиев ASTEX қаржы пирамидасын құрды. Туысы Ержан Мансұровпен бірге ұйымдасқан қылмыстық топ құрд. Мансұров жеке мүддесін көздеп, қаржы пирамидасын дамыту бойынша тапсырмаларды орындаумен айналысты. Осылайша Astex ЖШС тіркелді. Құрманғалиев салымшыларға жылына уәде етілген 240 пайызын төлей алмайтынын біліп, қызметін жалғастырды және жаңа клиенттерді тартты. Ол жаңа салымшылар санын үнемі көбейту керек екенін түсінді. Бірнеше айдан кейін олар өз қызметіне деген сенімді арттыру мақсатында танымал тұлғаларды тартты. Руслан Бұрқанов, Әзімжан Саидбаев және Мейірхан Шерниязов іске қосылды. Аталған адамдар ұсынылған іс-әрекеттердің заңсыздығын түсініп, қаржы пирамидасына қатысуға өз келісімдерін берді.

Mudarabah Capital мен Astex арасында келісім жасалды. Бұл келісім Mudarabah Capital Astex құрылымдық бөлімшесі болғанын көрсетеді. Mudarabah Capital-да құрылтайшылардың құрамына кіретін Бұрқанов директор болып тағайындалды. Құрылтайшы болған Саидбаев әлеуметтік желілерде үгіт-насихат және жарнамалық науқан жүргізуі керек еді. Ол сондай-ақ құрылтайшылар арасында қаражат бөлуге қатысты. Шерниязовта да осындай рөл болды. Төребаев пирамиданы насихаттап, үгіт-насихат жүргізіп, оған қаражат салып, оны әлеуметтік желілерде жарнамалауы керек еді. Төребаев құрылтайшылар тізіміне енгізілді. Олардың барлығында жарғылық капиталға қатысу үлесінің 11-11,5 пайызы болды, – деп атап өтті прокурор.

Кейін судья Кәмшат Саурова айыпталушылардың пікірін сұрады. Шерниязов пен Төребаев қаржы пирамидасын құрды және ұйымдастырды деген айыппен  келіспейтіндерін және өз кінәсін мойындамайтынын мәлімдеді.