Қазақстан халқы несиеге тәуелді – Ертісбаев

Қазақстан Халық партиясының төрағасы Ермұхамет Ертісбаев қаңтар оқиғасына халықтың несиеге байлануы себеп болғанын айтты.

27 маусымда Қазақстанның халық партиясында жеке тұлғалардың банкроттығы туралы заң жобасы талқыланды.

– Биылғы 5 қаңтардағы наразылықтың бір себебі – халықтың несиеге тәуелді болуы. Жалпы, соңғы үш жылда жеке тұлғаларға несие беру 70%-ға дерлік өсіп, өте үлкен, астрономиялық санға жетті. 11 трлн 400 млрд теңге, ал қазір 6 млн 300 мың Қазақстан азаматы банктен несие алған. Тағы 1 млн 200 мың қазақстандық МҚҰ-ға қарыз. Бұл Қазақстанның барлық дерлік ересек халқы, — деді Ертісбаев партия отырысында.

Халық партиясында заң жобасын таныстырған экономист Рахым Ошақбаев қайтыс болғаннан кейін қарыз алушының несиесін оның туыстарына төлетуден бас тартуы қажет екенін мәлімдеді.

Фото ашық деректерден