Қазақстан Палестина халқына 1 миллион доллар көлемінде гуманитарлық көмек береді

Қазақстан Палестина халқына 1 миллион доллар көлемінде гуманитарлық көмек бермек. Бұл туралы Түркі елдері ұйымының Х Саммитінде Қасым-Жомарт Тоқаев мәлімдеді, деп хабарлайды Exclusive.kz тілшісі.

Әлемнің түкпір-түкпірінде жағдайдың тұрақсыз екенін айтқан мемлекет басшысы Газа Секторындағы бейбіт тұрғындарға көмектесу басты міндет деп атап өтті.

– Солтүстікте Ресей мен Украина, Таяу Шығыста Израиль мен Палестина арасында қанды қақтығыс болып жатыр. Ауғанстанның жағдайы да тұрақсыз. Батыста заңсыз көші-қон мәселесі ушығып тұр. Бүгінде Газа Секторындағы бейбіт тұрғындар, әсіресе, балалар және қарттар жанжал азабын шегуде. Олардың қауіпсіздігін қамтамасыз ету – басты міндет. Осы орайда, Қазақстаннан Палестина халқына 1 миллион доллар көлемінде гуманитарлық көмек беру туралы шешім қабылдадым. Ондаған жыл бойы шешімін таппаған өзекті мәселелерді зорлық-зомбылық көрсету және лаңкестік әдістер арқылы шешу мүлдем дұрыс емес. Қазақстан мұндай тәсілдерді қатаң айыптайды. Ахуал ушығып кетсе, оның салдары тіпті ауыр болуы мүмкін. Бұл ретте кез-келген жанжалды бейбіт келіссөз және дипломатиялық диалог арқылы ғана шешуге шақырамыз. Біз үшін әр елдің аумақтық тұтастығын сақтау және оның ішкі ісіне қол сұқпау – басты басымдық. Халықаралық құқық нормаларын сақтай отырып, Біріккен Ұлттар Ұйымы Қауіпсіздік Кеңесінің қарарларын мүлтіксіз орындау маңызды, – деді Тоқаев.

Фото: BBC