Бүгін Қасым-Жомарт Тоқаев 70 жасқа толды

Бүгін Қазақстан президенті Қасым-Жомарт Тоқаев 70 жасқа толды. Мемлекет басшысының туған күніне байланысты ешқандай мерекелік іс-шаралар жоспарланбаған, деп хабарлайды Exclusive.kz.

Тоқаевтың баспасөз хатшысы Руслан Желдібай президенттің мұндай шараларды қолдамайтынын айтқан еді.

– Президенттің Баспасөз қызметіне бұқаралық ақпарат құралдарынан Мемлекет басшысы туған күнін қалай атап өтетіні туралы сұрақтар келіп түсіп жатыр. Осыған орай ешқандай іс-шара жоспарланбағанын хабарлаймыз. Президент мұндай шараларды қолдамайды. Мемлекет басшысы 17 мамыр күнін жұмыс кестесіне сай өткізеді. Қазақстанда да, ҚХР-ға сапар аясында да Президенттің туған күніне байланысты ешқандай іс-шара өткізілмейді, – деп жазды президенттің баспасөз хатшысы Руслан Желдібай facebook-те.

Бүгін Қасым-Жомарт Тоқаев мемлекеттік сапармен Қытайға барып,ю, «Қытай — Орталық Азия» саммитіне қатысады.

Қасым-Жомарт Тоқаев 1953 жылы 17 мамырда Алматы қаласында туған. Әкесі – Кемел Тоқаев (1923-1986) Ұлы Отан соғысының ардагері, белгілі жазушы, қазақ әдебиетінің детективті-шытырман оқиғалы жанрының негізін қалаушы. Шешесі – Тұрар Шабарбаева (1931-2000) Алматы шет тілдері педагогикалық институтында қызмет еткен.

Тоқаев 1975 жылы Мәскеу мемлекеттік халықаралық қатынастар институт бітірген. КСРО-ның Қытай Халық Республикасындағы елшілігінде диплом алдындағы тағылымдамадан өткен. 1983-1984 жылдар аралығында Бейжің лингвистика институтында тағылымдамадан өтті. 1992 жылы Ресей Федерациясы Сыртқы істер министрлігінің Дипломатиялық академиясын тәмамдады.

Еңбек жолын 1975 жылы КСРО-ның Сыртқы істер министрлігінде бастап, Кеңес Одағының Сингапур Республикасындағы елшілігіне жұмысқа жолданған.

Фото: ашық дереккөз