Ердоған Украинадағы қантөгісті тоқтатуға шақырды

Астана қаласында Азиядағы өзара ықпалдастық және сенім шаралары жөніндегі кеңестің VI саммиті өтті. Кеңесте сөз алған Түркия басшысы Украинадағы жағдай барлық әлемге кері әсерін тигізгенін айтты.

– Біз Украинадағы дағдарыстың салдарын аймақтық және жаһандық деңгейде көріп отырмыз. Мен әрқашан әділдікке дипломатия арқылы қол жеткізуге болады деп айтамын. Соғыста жеңімпаз болмайды, әділдіктен ешкім жеңілмейді , – деді Түркия президенті.

Ол Түркия мен БҰҰ-ның соғыстың жағымсыз салдарын жою жөніндегі күш-жігері бүкіл әлемде мойындалғанын атап өтті. Сондай-ақ Қара теңіз арқылы украин астығын экспорттау туралы Стамбул келісімі және тұтқындармен алмасу айтарлықтай жетістік екенін баса айтты

– Біздің мақсатымыз – барлық қиындықтарға қарамастан қантөгісті мүмкіндігінше тезірек тоқтату, – деді Ердоған.