Антикор LRT ісіне жауапты тұлғаларды іздеу бойынша мәлімдеме жасады

Сыбайлас жемқорлыққа қарсы қызмет Нұр-Сұлтанда LRT ісі бойынша Талғат Ардан мен Қанат Сұлтанбековті іздеуге қатысты мәлімдеме жасады.

Ведомствоның мәліметінше, Ардан мен Сұлтанбеков елорда әкімдігінің лауазымды тұлғаларына және басқа да тұлғаларға қаржы жымқыру фактілері бойынша қозғалған қылмыстық іс аясында халықаралық іздеуге жарияланған.

— Қабылданған шаралар Ардан Т.-ның Түркияда екенін анықтады.Сот оны қамауға алу туралы сырттай санкция берді.Осы мемлекеттің құқық қорғау органдары оның тұрған жерін анықтау және қамауға алу шараларын жүргізуде.

— Сонымен бірге Қ.Сұлтанбековтың АҚШ аумағында екені анықталды. Оны қамауға алу және экстрадициялау туралы өтініштер бірнеше рет жіберілді. Алайда АҚШ заңы бойынша, «қызыл бюллетеньдің» болуы, егер ол миграциялық режимді бұзбаған болса, іздеуде жүрген адамды ұстауға негіз болып табылмайды. Сонымен қатар, қылмыскерлерді экстрадициялау туралы екіжақты келісімнің жоқтығы азаматымызды экстрадициялауды қиындатып отыр. Бұл мәселені уәкілетті орган пысықтап жатыр, — делінген хабарламада.

Сыбайлас жемқорлыққа қарсы қызмет іздеуде жүрген Қ.Сұлтанбеков пен Т. Арданның қоғамдық сайтта болмауы олардың Интерполдың деректер базасында жоқтығын білдірмейтінін де айтты.