Ресей Сыртқы істер министрлігінің ресми өкілі Мария Захарова Түркия президенті Режеп Тайып Ердоғанның Сирияның солтүстігінде жаңа әскери операцияның басталғаны туралы мәлімдемесіне қатысты пікір білдірді.

– Мұндай күштік операция туралы хабарламаны дабыл ретінде қабылдадық. Мұндай қадам, Сирия Араб Республикасының заңды Үкіметінің келісімі болмаған кезде, САР егемендігі мен аумақтық тұтастығын тікелей бұзу болып табылады және осы елдегі шиеленістің қосымша ушығуына себеп болады. Анкара Сириядағы қазірдің өзінде қиын жағдайдың нашарлауына әкелуі мүмкін әрекеттерден бас тартады деп үміттенеміз.

Бұл ретте біз САР шекаралас аудандарынан келетін ұлттық қауіпсіздікке төнетін қауіп-қатерлерге байланысты Түркияның алаңдаушылығына түсіністікпен қараймыз. Осыған байланысты Сирия-Түркия шекарасында сенімді қауіпсіздікті оған іргелес аймақта САР күш құрылымдарының әскери қызметшілерін орналастыру арқылы ғана қамтамасыз етуге болады деп ойлаймыз. Бұл Анкараның Сирияның егемендігі мен аумақтық тұтастығын құрметтеу туралы бірнеше рет ресми айтылған мәлімдемелерінің көрінісі болар еді, — деді Захарова.

Ердоған Түркия Сирияның солтүстігінде Таль-Рифаат және Манбидж елді мекендерін террористерден тазарту бойынша жаңа әскери операция бастайтынын мәлімдеген.

Фото ашық деректерден

• 237
• 226