Алматыда Дэмиен Хёрсттің «Жаңа дін» көрмесі өтеді

2016 жылдың 12 қараша күні сағ. 10.00-де Қастеев атындағы Мемлекеттік өнер мұражайы британдық танымал суретші Дэмиен Хёрсттің «Жаңа дін» көрмесін назарларыңызға ұсынады. Көрмені British Council (Британдық Кеңес) және Ә. Қастеев атындағы Мемлекеттік өнер мұражайы Пол Столпердің галереясымен бірлесіп, «Еуразиялық мәдени альянс» қоғамдық бірлестігінің қолдауымен ұйымдастырған. Көрменің шеңберінде өткізілетін білім беру іс-шараларының топтамасы Дэмиен Херсттің қазіргі заманғы мәдениетке жасаған ықпалы туралы жария дәрістерді, гид өткізетін экскурсияларды және суретшінің өмірі туралы фильмнің көрсетілімін қамтиды. Көрме желтоқсан айының 19-на дейін созылады.

«Жаңа дін» көрмесі медицина мен діни сенімнің, өнер мен діннің арасындағы күрделі қатынасты зерттейді; ойлануға қозғау салатын және кейде көптеген дау тудыратын суретші Дэмиен Хёрсттің шығармашылығында осы тақырыптар көптеген жылдар бойы өзекті мәселе болып отыр. «Жаңа дін» алғаш рет 2005 жылы Пол Столпердің галереясында көрмеге қойылды, содан кейін көрме Ослода, Мәскеуде, Венецияда, Софияда, Гданьскіде және Лондондағы Барлық Әулиелер Шіркеуінде өтті.

«Мен өмірде маңызды төрт нәрсе бар деп ойлаушы едім, бұл: дін, махаббат, өнер мен ғылым… Солардың ішіндегі ең дұрысы ғылым болып көрінеді. Ол да дін сияқты, бәлкім, түптің түбінде бәрі де жақсы болар деген үміт отын жағады», – дейді Дэмиен Хёрст «Жаңа дін» жайлы.

«Жаңа дін» көрмесінің негізінде діни сенім және адалдық пен болмыстың мәнісін іздеуге деген мұқтаждық жатыр. Түрлі элементтер бізді құрсаулаған ажал алдындағы қорқынышқа және ажалдан алыс жүруге деген тілекке арналған ой ғибадатханасын жасап, өзара әрекеттеседі. Медицинаға да, дінге де деген сенімнің түп-тамыры осы тілекте жатыр, аталған көрменің шеңберінде осы тілек «Әулие Үштік» сияқты туындылар арқылы бейнеленген, онда рухани сенімнің парасатты бастауын баса көрсету мақсатында шеңберлі диаграмма қолданылады.

«Жаңа дін» көрмесінің кеңістігін қалыптастыратын қырық төрт принт пен төрт мүсін «Дүниенің жаратылуынан» бастап «Крест жолы» арқылы «Қиямет күніне» дейінгі фрескалар топтамасын құрайды. Принттер самырсын ағашынан жасалған крест, асыл тастармен безендірілгендей домалақ дәрілермен көмкерілген баланың бас сүйегі, орасан зор мәрмәр таблетка және ұстара мен шприцтердің инелері сұғылған, тікенекті сымға оралған жүрек қойылған мехрабты қоршай орналастырылған.

Осы экспозицияны айналдыра орналастырылған принттер топтамасы медициналық дәрі-дәрмекдің пәрменділігіне деген біздің сеніміміздің Киелі махаббаттың Фәни махаббатпен бірлестігі екендігіне тұспал жасағандай болады. Сырт қарағанда бір ретке келтірілген және құрылымдалған медициналық карта Інжілді оқудың жаңа тәсіліне айналады. Інжілдің сәуегей болжамдары медициналық құрамдастар және бізді емдеп жазады деп өзіміз кәміл сенетін дәрілердің атаулары түрінде бейнеленген. Жарқын түсті аяда басылған осы «керемет дәрілердің» жақсы ретпен орналастырылуы оларға биік, киелі мәртебе береді.

Таблеткалардың суреті салынған принттер осы тақырыптарды аша түседі, ал бас сүйек пен көбелек бейнеленген принттер соңы ажалға әкелетін өмірдің зулаған ағынының рәмізі болып табылады. Принттер мен мүсіндердің толық топтамаларының он үш жинағы көрменің композициялық орталығы болып табылатын, арнайы құрастырылған үлкен сандықтың ішінде орналастырылған.

«Жаңа дін» көрмесі Хёрсттің наным-сенім, ажал, махаббат, нәпсіге еру және тұтыну сияқты ұғымдарға көзқарасын бейнелейді, осы ұғымдар соңғы 25 бойы оның шығармашылығының басым тақырыптары мен негізгі мәні болып отыр.

«Жаңа дін» көрмесінің сайты: https://www.britishcouncil.kz/kk/programmes/arts/damien-hirst

• 76
• 78