Композитор Арман Қайназаровтың өліміне қатысты күдікті ұсталды

Бүгін ақын, композитор Арман Қайназаров қайтыс болғаны туралы қаралы хабар тарады. Марқұм кафе маңында жігіттермен төбелесіп қалған, деп хабарлайды Exclusive.kz тілшісі.

– Ол 4 қыркүйекте Шаңырақ шағынауданындағы кафе маңында жігіттермен төбелесіп қалған. Сол күні жансақтау бөліміне түсті. Кейін комаға түскен. 19 қыркүйекте ол қайтыс болды, – деді журналист Тимур Нұғман.

NUR.KZ мәліметінше, Алматы қалалық полиция департаментінің баспасөз қызметі тілшісіне музыканттың қайтыс болғанын растады.

– Аталған факті Алатау аудандық полиция бөліміне Қылмыстық кодекстің 106-бабының 3-бөлігімен тіркеліп, тергеу амалдары жүргізілуде. Осы қылмысты жасаған күдікті ұсталып, қамауға алынды. Басқа да мән-жайлар анықталуда, – деп хабарлады полиция департаментінің баспасөз қызметі.

Фото: скриншот