ҚМДБ ұстанымы: Бас мүфти мектепте хиджаб кию мәселесі бойынша пікір білдірді

Қазақстан мұсылмандары діни басқармасының төрағасы Наурызбай қажы Тағанұлы мектепте хиджаб кию мәселесі бойынша пікір білдіріп, тілшілердің сұрағына жауап берді, деп хабарлайды Exclusive.kz тілшісі.

Бас мүфти мектеп әкімшілігі рұқсат етпеген, оқу орнына хиджаб киіп келетін оқушылардың жағдайы туралы айтып, мәселенің қаралып жатқанын атап өтті.

– Қазір бұл мәселе қаралуда. Біз бұл туралы мәлімдеме жасадық. Бірақ, әрине, қазір ең алдымен тыныштық пен бірлікті сақтау маңызды. Сонымен қатар біз бұл мәселені мектеп оқушылары мен мұғалімдер арасында талқылаймыз және оны өз деңгейінде шешкен жөн деп санаймыз, – деді Наурызбай қажы Тағанұлы.

Сондай-ақ ол ҚМДБ шариғаттың талабы бойынша қыздар балиғат (кәмелетке толған) жастан бастап орамал тағуы керек деген ұстанымда екенін айтты.

– ҚМДБ жанында 9 сыныптан бастап қыздар оқитын 9 медресе-колледж бар. Яғни, орамал киген қыздар үшін мұндай мүмкіндік қарастырылған. Медресе колледжінде Білім Министрлігінің стандарттарына сәйкес білім беріледі. Сондықтан Студенттер зайырлы әрі діни білім алады, – деді Тағанұлы.

Фото: ашық дереккөз