Нығматулиндер иелігіндегі зауыттың жұмысшылары ереуілге шықты

Тараздағы «Қазфосфат» ЖШС зауытының жұмысшылары ереуілге шықты. Наразылық білдіргендер Ресейден келген жаңа менеджерлер қазақтарды қорлады деп мәлімдеді.

Ереуілге шыққан жұмысшылардың бейнежазбасы әлеуметтік желілерде таралды.

– «Қазфосфат» ЖШС зауытына Нығматулиннің шақыруымен ресейліктер келді. Ресейлік шенеуніктер қазақтарды үнемі қорлайды. Кеше ғана басшылардың бірі қызметкерін қойға теңеді. Барлық жұмысшылар оның қазақтардан кешірім сұрағанын күтеді, – деп айтылды бейнежазбада.

Сонымен қатар, Жамбыл облысының еңбек инспекциясы «Қазфосфат» басшыларының бірі дөрекі сөздер айтқанын растады.

– «Қазфосфат» компаниясының қызметкерлері арасында түсініспеушілік болған. Цифрлық трансформация басқармасының бастығы әріптестеріне дөрекі сөздер айтқан. Жамбыл облысы әкімінің бірінші орынбасары Нұржан Календеров, облыс әкімінің орынбасары Қанатбек Мәдібек, облыс прокурорының орынбасары Нұрбек Ұласбекұлы қызметкерлермен кездесіп, түсіндіру жұмыстарын жүргізді. «Қазфосфат» ЖШС цифрлық трансформация басқармасының бастығы әріптестерінен кешірім сұрады. Ол қызметінен босатылды, – деп хабарлады ведомстводан.

«Қазфосфат» ЖШС құрылтайшылары – Нидерландыда тіркелген Kazakhmys Resources B. V. компаниясы. Құрылтайшылар қатарында Нұрлан Нығматулиннің ұлдары Нұрхан мен Нұржан Нұрлановтар да бар. Компанияның бас директоры – Нұрхан Нұрланов.

Коллаж: Arbat. Media