Қазақстандықтар ақшаның жетіспеушілігінен ашығамыз деп алаңдайды – сарапшылар

Қазақстанда азық-түлік тауарларының бағасы жыл басынан бері 16% қымбаттап кетті. ҚР СЖРА ҰСБ жыл сайын наурызда өткізетін «Халықтың өмір сүру сапасы» сауалнамасының нәтижелеріне сүйенсек, азық-түлік қауіпсіздігі бойынша, ақша мен өзге де ресурстардың жетіспеушілігі салдарынан азық-түлік жетпеуі мүмкін деп қауіптенетін респонденттердің үлесі 5,7%-ды құрады, бұл алдыңғы нәтижелерден жақсы (2021 жылы — 6,6%, 2020 жылы — 7,1%, 2019 жылы — 9,4%). Бұл ретте бұл сұраққа жауап беруге қиналғандардың үлесі бір жылда 3%-дан 4%-ға, ал жауап бергісі келмегендер 1,8%-дан 2%-ға дейін өскен.

Energyprom.kz мәліметінше, бұл ретте ақшаның немесе басқа ресурстардың жоқтығынан күні бойы тамақ ішпеген респонденттердің үлесі бір жыл ішінде 0,5%-дан 1,3%-ға дейін өсті. Бұл жағдайда респонденттердің тағы 2,6%-ы мұндай қиын жағдайлардың болған-болмағаны туралы жауап беруге қиналған, ал 2,5%-ы жауап беруден бас тартқан.

Елді мекендерге келетін болсақ, ақшаның немесе басқа ресурстардың болмауына байланысты азық-түлік жетіспейді деп алаңдайтындардың үлесі қалалық жерлерге қарағанда ауылдық жерлерде жоғары. Ауылда 5,9%, қалада 5,6%. Гендер бойынша, әйелдердің арасындағы көрсеткіш 6,3%, ерлер арасында 4,9%.

Соңғы он екі айда ақшаның немесе басқа да ресурстардың жоқтығынан бір күн бойы тамақ ішпегендердің үлесі ауылдық және қалалық жерлерде бірдей: 1,3%. Гендерлік жағынан әйелдер арасында 1,4%, ерлер арасында 1,1%.

Жұмыспен қамтылу жағдайы бойынша өзін-өзі жұмыспен қамтығандар өздерінің азық-түлік қауіпсіздігіне ең аз алаңдаушылық білдірді: небәрі 5,3%. Жалдамалы қызметкерлер арасында респонденттердің 5,5%-ы ақшаның немесе басқа ресурстардың жетіспеуіне байланысты азық-түлік тапшылығына алаңдаушылық білдірді, ал жұмыссыздар арасында әрбір оныншы респондент алаңдаулы.

Сонымен қатар, ақшаның немесе басқа ресурстардың жоқтығынан соңғы 12 айда бір күн бойы тамақ ішпегендердің ішіндегі ең азы жалдамалы жұмысшылар: бар болғаны 1%. Олардан кейін өзін-өзі жұмыспен қамтығандар — 1,4%, ал жұмыссыздар арасында көрсеткіш 4,1%.

Жасына қарай, аштықты бастан өткергендердің үлесі 39 бен 48 жас аралығындағы респонденттер арасында ең жоғары: 2%. Олардан кейін жасы бойынша зейнеткерлер (58/63 жас және одан жоғары) 1,5% және зейнет алдындағы адамдар (49-57/62 жас) — 1,2%.

15 пен 17 жас аралығындағы респонденттердің арасында ақша тапшылығына байланысты күні бойы аш жүруге мәжбүр болғандардың үлесі ең аз: бар болғаны 0,5%.

Биылғы жылдың маусым айы қорытындысы бойынша азық-түлік бағасы бір айда 1,9% қымбаттаса, жыл басынан бері бірден 15,7% қымбаттады. Бір жыл ішінде, яғни 2021 жылдың маусымымен салыстырғанда азық-түлік бағасы бірден 19,2% қымбаттады.

Фото: zn.ua

• 38
• 44