Алматы әкімдігі «Демократиялық күштер коалициясына» митинг өткізуге рұқсат бермеді

Алматы әкімдігі «Демократиялық күштер коалициясына» 17 қыркүйек күні президенттің мерзімінен бұрын сайлауына қарсы митинг өткізуге рұқсат бермеді.

Ерлан Қалиев пен Арайлым Назарова 17 қыркүйекте сағат 12.00-15.00 аралығында Алматыдағы Шоқан Уәлиханов атындағы алаңда митинг өткізетіні туралы әкімдікке ескерту хат тапсырған. Әкімдік ол күні алаңда «қоғамдық-мәдени шара өтетінін» айтып, ескертуді кері қайтарды. Бұл туралы белсенді Ерлан Қалиев өзінің Facebook парақшасында жариялады.

– Алматы қаласының әкімдігі атынан атқарушы билік дәл осы күнге жоспарлаған мәдени-бұқаралық іс-шараларды сылтауратып, митинг өткізуге тыйым салды, – деп жазды Қалиев.

1 қыркүйекте Қазақстан халқына Жолдауы кезінде президент Қасым-Жомарт Тоқаев осы күзде мерзімінен бұрын президент сайлауын өткізу туралы шешімін жариялады. Осыдан кейін оппозициялық саясаткерлердің, журналистердің, азаматтық белсенділердің және құқық қорғаушылардың бір бөлігі демократиялық күштер коалициясын құрды.

Фото: Власть

• 36
• 36