Ресей мен Украина кейбір секторларда атысты тоқтатуға келісті

Ресей мен Украина делегацияларының келіссөздері аяқталды. Украина президенті кеңсесінің кеңесшісі Михаил Подоляк кездесудің үшінші бөлімі болады деп мәлімдеді.

Украина басшысы кеңсесінің кеңесшісі тараптар жақын арада гуманитарлық дәліздер ұйымдастыратынын айтты. Осыған байланысты бірқатар секторларда атыс тоқтатылады.

— Осы мақсатта жақын арада арнайы байланыс және өзара іс — қимыл арналары ұйымдастырылады, тиісті логистикалық рәсімдер құрылады, — деді Подоляк.

Өз кезегінде Ресей президентінің көмекшісі Владимир Мединский тараптар «позициялар бойынша түсінікке қол жеткізе алды» деді.

— Украин тарапымен келіссөздер аяқталды, онда біз барлық үш мәселені егжей-тегжейлі талқыладық: әскери мәселе, халықаралық гуманитарлық мәселе және үшінші мәселе-жанжалды болашақ саяси реттеу мәселесі. Позициялар өте айқын. Олардың бір бөлігі бойынша түсіністікке қол жеткізілді, — деді Мединский.

Сондай-ақ, ол тараптар бейбіт тұрғындардың шығуы үшін Украинадағы гуманитарлық дәліздер туралы келіскендерін растады.

• 101
• 98