Сарым Демократиялық күштер коалициясын «ескі Қазақстан» деп атады

Саясаттанушы, мәжіліс депутаты Айдос Сарым қызметінен кетпейтінін айтып, демократиялық күштердің коалиция құру әрекетіне пікір білдірді.

– Мүмкін, менің кейбір «достарым» немесе «жанкүйерлерім» менің кеткенімді қалайтын шығар. Мен кез келген жағдайда сайлау науқанына, сайлауалды штабтың жұмысына қатысамын. Парламентте мықты адамдарды көргім келеді. Егер партия менің келесі Мәжілістің жұмысына қатысуым қажет деп есептесе, шешім қабылдайтын боламын. Мен өзім жеңіске жететінімізге сенімдімін. Бұған еш күмәнім жоқ. AMANAT партиясын ешкім қолдамайды деген әңгімелер – нонсенс! AMANAT мықты рейтингке ие, қолдаушылар базасы бар. Қостанай облысындағы өрттен зардап шеккендерге партияның қалай көмектескенін қараңыздар. Барлығы алматылық кофеханалар немесе Facebook арқылы өлшенбейді, – деді ол.

Жақында құрылған коалиция туралы пікір білдірген депутат партия құрғысы келетіндердің көбі бірінші баспасөз конференциясынан әрі аспайтынын айтты.

– Менің қарапайым есебім бойынша, Қазақстанда партияны қаржыландыруға жылына кемінде төрт-бес миллион доллар кетеді. Бұл облыстарда, аудандарда қандай да бір іс-шаралар өткізуге, кеңсеге, машиналарға, компьютерлерге ақы төлеуге, кейбір ақпараттық өнімдер шығаруға қажет қаражат. Менің ойымша, Қазақстанда тек үш-төрт жаңа партия ғана пайда болуы мүмкін, – деді Сарым.

Саясаттанушы бүгінгі күні адамдардың жеке қауіпсіздікке көбірек алаңдайтынын атап өтті және Әміржан Қосановтың президенттік жарысқа қатысу мүмкіндігін жоққа шығармады. Сондай-ақ, депутат Арман Шораевтың Ермұрат Бәпиді кандидат ретінде ұсынуы туралы ойын айтты.

– Мен Бәпи немесе басқа біреу қазіргі президентке нақты балама деп ойламаймын. Менің ойымша, бірінші кезеңде 20-30 адам президенттік сайлауға қатысуға ниет білдіреді, кейін жеті-сегіз кандидат қалуы мүмкін, – деді ол.

• 35
• 33