Министр АЭС бойынша төтенше жағдайға мемлекет жауап бермейтінін айтты

Журналистер ҚР Энергетика министрі Мағзұм Мырзағалиевке АЭС бойынша бірқатар сұрақтар қойды. Министрдің айтуынша, АЭС-те төтенше жағдай бола қалса, инвесторлар жауапты болмақ.

«Егер халықтың көп бөлігі АЭС құрылысына қарсылық танытса, шешімнің күші жойыла ма?» деп сұрады журналистер.

— Бұл саяси сұрақ. Мен Энергетика министрі ретінде айтамын. Бізге станция салу керек екенін көріп отырмыз. Бізде таңдау болады: жарықсыз қалу немесе бір шешім қабылдау. Бізде ешқандай жол жоқ. Мұны түсіну керек, — деп жауап берді министр.

Журналистер «Энергетика министрлігі өз тарапынан Чернобыль атом электр станциясы мен Фукусимадағыдай төтенше жағдай болмайтынына кепілдік бере ме?» деп сұрады.

— Біріншіден, әрине, ешкім ешқашан кепілдік бермейді. Бірақ атом электр стансасын салу кезінде қауіпсіздікке баса назар аударылып, жауапкершілік АЭС салатын компанияға немесе инвесторға жүктеледі, — деді Энергетика министрі.

• 103
• 101