Қасым-Жомарт Тоқаев Nazarbayev University-не барып, жоғары оқу орнының білім беру, ғылыми-зерттеу жұмыстарымен және университетті одан әрі дамыту стратегиясымен танысты. Бұл туралы Ақорданың баспасөз қызметі хабарлады.

Президентке кампус, ғылыми орталықтар мен зертханаларды дамыту жоспары көрсетіліп, ғылым, денсаулық сақтау, цифрландыру, ауыл шаруашылығы, экология және спорт салаларындағы әртүрлі білім беру жобалары мен бағдарламалары таныстырылды.

— Қасым-Жомарт Тоқаевқа университеттің шетелдік жетекші ғылыми, білім беру орталықтарымен ынтымақтастығы, медицина және инновациялық кластерлердің жұмыстары, сондай-ақ оқу орны түлектерінің стартап-жобалары жөнінде мәлімет берілді, — делінген хабарламада.

Оқу орнын аралаған мемлекет басшысы студенттермен әңгімелесіп, университеттің құрметті қонақтар кітабына қолтаңбасын қалдырды.

Фото: Ақорда

• 80
• 92