Жастар өз ісінің майталмандарына қарап бой түзеуі керек – Тоқаев

Мемлекет басшысы Қасым-Жомарт Тоқаев Қазақстан халқын Еңбек күні мерекесімен құттықтады, деп хабарлайды Exclusive.kz тілшісі Ақорданың баспасөз қызметіне сілтеме жасап.

– Құрметті отандастар! Сіздерді Еңбек күнімен шын жүректен құттықтаймын! Бұл – мемлекетіміздің тұрақты дамуына жасампаз ісімен үлес қосып келе жатқан нағыз еңбекқор жандарды ұлықтауға арналған маңызды мереке. Олар туған елдің жарқын болашағы үшін күн сайын тынбай еңбек етіп, отаншылдықтың озық үлгісін көрсетіп жүр. «Адал азаматқа» тән еңбекқорлық, іскерлік, жауапкершілік, білімпаздық және жақсыдан үйрену, жаманнан жирену сынды асыл қасиеттің бәрі шынайы еңбек адамының бойынан табылады. Сондықтан өз ісінің майталмандары қашанда қоғамның назарында болуға тиіс. Ал, жастарымыз соларға қарап бой түзеуі керек, – деді Тоқаев.

Мемлекет басшысы адал еңбек табысқа жетудің кілті екенін айтып, Әділетті Қазақстанды еңбекқор азаматтар құратынына сенім білдірді.

– Халқымыз «Еңбек – адамның көркі, адам – заманның көркі» деп бекер айтпаған. Шын мәнінде, адал еңбек – бүкіл жетістіктің бастауы, табысқа жетудің кілті. Мемлекет осы басты қағидат барлық жерде салтанат құруы үшін бәрін жасайды. Мен Әділетті Қазақстанды еңбекқор, адал азаматтар ғана құра алатынына кәміл сенемін. Баршаңызға зор денсаулық, бақ-береке тілеймін! – деді президент.

Фото: aqorda

• 30
• 32